初哥想買股票賺錢，要注意啲咩？

對初初買股票的朋友來說，要在股票市場賺錢，要注意啲咩呢？

1. 第一，要問自己有幾多閒錢去買股票 ？係閒錢，不是救命錢，或者開飯錢！究竟呢筆錢可以投資幾耐？諗下就好似你煮飯仔，打機過關打大佬，都要時間啦。要有好成績，係要俾時間嘅。好多初哥都好鍾意即日鮮，想賺快錢，但唔想坐貨。即日鮮好似一夜情，總係俾人好多刺激，有時刺激係要付出代價嘅，日日食街邊野，就遇咗有機會食物中毒。出得嚟行，遇咗要還，你明嘅。

2. 第二，係買咩野？點解要買？你對佢嘅生意瞭解嗎？間公司嘅生意安全嗎？會唔會在幾年內倒閉？夕陽行業？競爭好大？如果覺得自己好瞭解間公司，可以繼續跟進，但係間公司好複雜喎，難以理解運作喎，就close file。好似你準備識男仔/女仔，你心諗：呢個男仔為人老實，顧家喎，事業發展又幾好喎，唔嫖，又唔啪野，可以嘗試去瞭解下。咁當然，你見到個高大靚仔/性感靚女，好想date 佢，慢慢發現佢日日身光頸靚，原來係月光族，周身卡數，冇疫情時就過大海搏殺，有疫情都忍唔住用APPS 約女仔去酒店……，俾你發現時，就諗到千百個理由呃你。你同佢反面，佢話你知，佢係一隻無腳嘅雀仔，唔屬於任何一個人，只有繼續博愛，佢嘅生命先至會發光發熱。我諗大家都識揀。公司生意其實好簡單，㨂一間簡單，有前景嘅，試下同佢發展，好過你搵一個讓你擔驚受怕，日日要你貨水，當你懵丙嘅公司。

3. 第三，係咩時候買？你係要㨂周街啲人都話「買佢有買貴，冇買錯」同股價日日創新高嘅「超靚位」先嚟買，咁冇人幫到你，我可以話你聽，你嘅選擇只會令自己抱憾終身。就好似你見到個金融財俊/性感尤物，你又想同其他人爭，要爭就要付出更高代價。到佢真係被你私有化咗，初頭你好high, 後來你心情平靜啲，慢慢發現都係普通人啫，當佢嘅表現不似預期，你開始嬲自己，為佢付出全部，搞成今日咁。唔好怪人，怪就怪自己。

講住咁多先，有機會再分享。